दुधकोशी सामुदायिक अस्पताल

अझ हाम्रो जस्तो विकट हिमाली तथा पहाडी भुगोलमा स्वास्थ्य सेवा निकै चुनौति र जटिल बन्दै गएको छ । स्वास्थ्योपचारको अभावमा अकालमै ज्यान गुमाउनु ग्रामिण भेगका नागरिकको नियति नै बनेको छ । अस्पतालको पहुँच नपुगेकै कारण जिल्लामा बर्षेनी दर्जनौले ज्यान गुमाएको तथ्यांक हामीसँग ताजै छन् । उपचारकै अभावमा अल्पायुमा जो कोहीले ज्यान गुमाउनु नपरोस, धनी र हुनेखानेहरुको उपचार त जसरी पनि सम्भव होला, हाम्रो लक्ष्य गरिब र हुँदाखानेहरुका लागि केन्द्रित रहनेछ । सोलुखुम्बु जिल्लाको थुलुङदुधकोशी गाउँपालिकाको केन्द्र मुक्लिमा आधुनिक सुविधा सम्पन्न ५० शैयाको अस्पताल निर्माण गरि सबै जनताको स्वास्थ्य अधिकार सुनिश्चित गर्ने अभियानमा हामी जुटेका छौँ । कुलो एक बर्ष पछि पनि बनाउँदा फरक नपर्ला, तर रोगले एक मिनेट पनि छोड्दैन । यही ध्रुव सत्यलाई मनन गरि द्रुत गतिमा अस्पताल निर्माण गरि सेवा प्रवाहका लागि यही चैत्र २ देखि ९ गतेसम्म बृहत धार्मिक ज्ञानमहायज्ञको आयोजना गरिएको हो । वाचनप्रविण पण्डित दिनबन्धु पोख्रेलको वाचकत्वमा हुने महायज्ञबाट संकलित रकमले हाम्रो पिढिलाई मात्रै नभइ भावि पुस्तालाई नाशोको रुपमा अस्पताल निर्माण गरिनेछ । यो महान तथा पवित्र कार्यमा हामी सबैसँग हातोमालो गरेर अगाडि बढ्न चाहान्छौँ । किनकी अस्पताल सधैँका लागि अनि सबैका लागि हो ।